Ասում են, որ ծիծաղի 1 րոպեն մարդու համար համարժեք է 40 րոպե վազքի: Ծիծաղը ոչ միայն դրական է ազդում մարդու օրգանիզմի վրա, այլ նաև օգնում է հաղթահարել սթրեսային իրավիճակներն ու դեպրեսիան: Ծիծաղի օգնությամբ կարելի է դուրս գալ ամենաանելանելի թվացող իրավիճակներից: Ծիծաղը կարող է կոտրել սառը սրտեր, ազդել մարդկանց ենթագիտակցական այնպիսի մակարդակների վրա, որտեղ չեն կարող հասնել այլ ազդակներ: Երջանիկ մարդիկ անընդհատ ծիծաղում են: Եվ դա ստիպում է նրանց ավելի երջանիկ լինել: Երբ ծիծաղ ու երջանիկ մարդ եմ ասում, միշտ պատկերացնում եմ Ռիչարդ Բրենսոնին՝ միլիարդատեր, ով անընդհատ ծիծաղում է: Եթե դիտեք նրա հարցազրույցները, ինքներդ կհամոզվեք, որ նա ծիծաղով պատասխանում է նույնիսկ ամենալուրջ թվացող հարցերին: Եվ ինչո՞ւ ոչ. չէ որ ծիծաղը բխում է նրա սրտից:
Երբեք մի ամաչեք ծիծաղել: Երբեք մի մտածեք, որ ծիծաղելիս դուք կարող եք անլուրջ մարդու տպավորություն թողնել: Ինչպես մի անգամ նշել եմ, մարդը լուրջ է ոչ թե իր դեմքի արտահայտությամբ, այլ իր գործերով: Ծիծաղեք այնքան, ինչքան ուզում եք, ծիծաղեք այնտեղ, որտեղ ուզում եք, ծիծաղեք այնպես, ինչպես ուզում եք: Ծիծաղը երջանկության նշան է…